Dreamzaa Deklao

ການແຂ່ງຂັນກີລາຂອງບັນດາປະຊາຊາດອາຊີຕາເວັນອອກສຽງໃຕ້ ຫຼື ຊີເກມ ຄັ້ງທີ 25 ໂດຍການເປັນເຈົ້າພາບຂອງສາທາລະນະລັດ ປະຊາທິປະໄຕ ປະຊາຊົນລາວ ໄດ້ເປີດຂຶ້ນຢ່າງເປັນທາງການ ໃນຕອນແລງວັນທີ 9 ທັນວາ 2009 ທີ່ສະໜາມກີລາແຫ່ງຊາດ (ຫຼັກ 16) ນະຄອນຫຼວງວຽງຈັນ ໂດຍ ການເຂົ້າຮ່ວມເປັນກຽດຂອງພະນະທ່ານ ຈູມມາລີ ໄຊຍະສອນ ປະທານປະເທດແຫ່ງ ສປປ ລາວ ພະນະທ່ານ ບົວສອນ ບຸບຜາວັນ ນາຍົກລັດຖະມົນຕີ ແຫ່ງ ສປປ ລາວ ມີພະນະທ່ານ ຫວຽນເຕິນຢຸງ ນາຍົກລັດຖະມົນຕີ ແຫ່ງ ສ.ສ ຫວຽດນາມ ສົມເດັດອັກຄະມະຫາເສນາບໍດີ ເຕໂຈ ຮຸນເຊນ ນາຍົກ ລັດຖະມົນຕີ ແຫ່ງ ລາຊະອານາຈັກກຳປູເຈຍ ພະນະທ່ານພົນເອກ ເທນເຊນ ນາຍົກລັດຖະມົນຕີ ແຫ່ງ ສະຫະພາບມຽນມາ ພະນະທ່ານ ອະພິສິດ ເວດຊາຊີວະ ນາຍົກລັດຖະມົນຕີ ແຫ່ງ ລາຊະອານາຈັກໄທ ແລະ ພະນະທ່ານ ສຸລິນ ພິດສຸວັນ ເລຂາທິການໃຫຍ່ອາຊຽນ ພ້ອມດ້ວຍແຂກທັງພາຍໃນ ແລະ ຕ່າງປະເທດ ບັນດາທູຕານຸທູດ ອົງການຈັດຕັ້ງສາກົນປະຈຳລາວ ຕະຫຼອດຮອດມວນຊົນລາວບັນດາເຜົ່າ ແລະ ປະເທດອ້ອມຂ້າງ ແລະ ຄະນະ ນຳຄູເຝິກ ນັກກີລາຈາກປະເທດອາຊຽນ ແລະ ຕີມໍ ເຂົ້າຮ່ວມ.

ພະນະທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ແຫ່ງ ສປປ ລາວ ຜູ້ປະຈຳການລັດຖະບານ ປະທານຄະນະກຳມະການຈັດມະຫະກຳ ກີລາຊີເກມ ຄັ້ງທີ 25 ໄດ້ກ່າວລາຍງານໃນພິທີວ່າ ໃນເດືອນມິຖຸນາ ປີ 1959 ສະຫະພັນກີລາຊີເກມ ໄດ້ຮັບການສ້າງຕັ້ງຂຶ້ນ ໂດຍ 6 ປະຊາຊາດໃນ ອາຊີຕາເວັນອອກສຽງໃຕ້ ໃນນັ້ນກໍມີປະເທດລາວ ມາຮອດປີ 2003 ອີງຕາມຄຳສະເໜີຂອງກຳມະການໂອລິມປິກແຫ່ງຊາດລາວ ຄະນະມົນຕີຊີເກມ ຈິ່ງ ໄດ້ຕົກເຫັນດີໃຫ້ ສປປ ລາວ ເປັນເຈົ້າພາບມະຫະກຳຊີເກມ ຄັ້ງທີ 25 ໃນປີ 2009 ເຊິ່ງກໍພໍດີກັບວັນຄົບຮອບ 50 ແຫ່ງການສ້າງຕັ້ງສະຫະພັນຊີເກມ ຂ້າພະເຈົ້າຂໍລາຍງານວ່າ ຊີເກມ  ຄັ້ງທີ 25 ມີ 25 ປະເພດກີລາ ແລະ ມີນັກກີລາຈາກ 11 ປະເທດສະມາຊິກ ຈຳນວນ 3.038 ທ່ານເຂົ້າຮ່ວມ ອັນ ທີ່ເປັນພິເສດສຳລັບຊີເກມຄັ້ງນີ້ ແມ່ນພວກເຮົາໄດ້ຮັບກຽດຕ້ອນຮັບນາຍົກລັດຖະມົນຕີຂອງ 4 ປະເທດເພື່ອນບ້ານໃກ້ຄຽງແລະເລຂາທິການໃຫຍ່ອາຊຽນເຊິ່ງເປັນເຫດການທີ່ບໍ່ເຄີຍມີໃນມະຫະກຳກີລາຊີເກມຄັ້ງຜ່ານໆມາສະຫຼຸບວ່າມາເຖິງເວລານາທີນີ້ ການກະກຽມດ້ານຕ່າງໆແມ່ນໄດ້ສຳເລັດເສັດ ສິ້ນເປັນທີ່ຮຽບຮ້ອຍ ແລະ ຮັບປະກັນມາດຕະຖານຂອງການຈັດແຂ່ງຂັນກີລາຊີເກມທຸກປະການ.

ຫຼັງຈາກນັ້ນ ພະນະທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ກໍໄດ້ໃຫ້ກຽດກ່າວເປີດມະຫະກຳກີລາຊີເກມ ຄັ້ງທີ 25 ຢ່າງເປັນ ທາງການ ໂດຍທ່ານໄດ້ກ່າວວ່າ: “ໃນນາມ ສາທາລະນະລັດ ປະຊາທິປະໄຕ ປະຊາຊົນລາວ ຂ້າພະເຈົ້າຂໍເປີດງານມະຫະກຳຊີເກມ ຄັ້ງທີ 25 ຢ່າງ ເປັນທາງການ ນັບແຕ່ນາທີນີ້ເປັນຕົ້ນໄປ” ເຊິ່ງໝາຍເຖິງງານມະຫະກຳກີລາຊີເກມ ຄັ້ງທີ 25 ໄດ້ເລີ່ມເປັນທາງການແລ້ວ.

ພາຍຫຼັງການກ່າວເປີດງານຢ່າງເປັນທາງການຂອງພະນະທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ແລ້ວ ກໍໄດ້ເລີ່ມຕົ້ນການສະ ແດງໃນລາຍການສິລະປະວັດທະນະທຳ ຈຳນວນ 7 ລາຍການ ໂດຍມີນັກສະແດງ 8 ພັນກ່ວາຊີວິດ ທີ່ເຈົ້າພາບນຳສະເໜີໃຫ້ແຂກໄດ້ຊົມ ເປັນການປະ ສົມປະສານຢ່າງກົມກຽວລະຫວ່າງສິລະປະວັດທະນະທຳ ຄວາມເປັນລາວ ແລະ ວິວັດທະນາການຂອງໂລກອ້ອມຂ້າງ ເຊິ່ງເລີ່ມຕົ້ນດ້ວຍບົດຟ້ອນ “ຍິນດີ ຕ້ອນຮັບກີລາຊີເກມ” ລວມເອົານັກສະແດງພັນກ່ວາຊີວິດ ສັນຍາລັກນຳໂຊກຊ້າງຈຳປາ-ຈຳປີ ອອກມາທັກທາຍມວນຊົນ ຈາກນັ້ນບັນດານາງສາວໃນ ຊຸດປະຈຳຊາດຂອງແຕ່ລະປະເທດ ກໍອອກມາກັບທ່າຟ້ອນຂອງປະເທດຕ່າງໆ ເຊິ່ງສ້າງຄວາມຕື່ນຕາຕື່ນໃຈໃຫ້ຜູ້ເຂົ້າຮ່ວມໄດ້ເປັນຢ່າງດີ ເຖິງວ່າຫຼາຍໆ  ປະເທດທີ່ເຄີຍຈັດງານຊີເກມຕ່າງສະແດງຄວາມທັນສະໄໝໃນພິທີເປີດ ແຕ່ສຳລັບ ສປປ ລາວ ກໍມີຄວາມເອກອ້າງໃນການນຳສະເໜີສິ່ງທີ່ຍັງຄົງຮັກສາ ໄວ້ໃນດິນແດນລ້ານຊ້າງດັ່ງບົດຟ້ອນ “ພົງໄພສາຍນ້ຳແລະຊີວິດ” ບັນດາສັດນ້ອຍໃຫຍ່ສົ່ງສຽງຮ້ອງອັນໜ້າອອນຊອນ ທັງລີງ ຊ້າງ ກວາງ ແມງກະເບື້ອງ…ສະແດງເຖິງຄວາມອຸດົມຮັ່ງມີ ແລະ ທິວທັດທຳມະຊາດອັນສວຍສົດງົດງາມຂອງປະເທດລາວ “ອອນຊອນທົ່ງນາສີຄຳ” ບົດຟ້ອນນີ້ ທົ່ວບໍລິເວນ ຈະເຫຼືອງເຫຼື້ອມໄປດ້ວຍຮວງເຂົ້າທີ່ສຸກເຫຼືອງ ມວນຊົນຕ່າງຊາບຊຶ້ງເຖິງຄຸນຄ່າຂອງເຂົ້າ ເຊິ່ງເປັນອາຫານຫຼໍ່ລ້ຽງຊີວິດແລະເຂົ້າໜຽວ ກໍເປັນພືດພັນເຂົ້າ ທີ່ເປັນເອກະລັກປະຈຳຊາດຂອງລາວຈາກທົ່ງນາສີຄຳທົ່ວສະໜາມກໍສະແດງແຈ້ງດັ່ງສີຄຳ ເມື່ອນັກຟ້ອນຍິງໃນຊຸດສີແດງບູຮານລາວ ພ້ອມຖືທຽນໃນ   ດອກບົວຂາວອອກມາສະແດງທ່າຟ້ອນອັນສະຫງ່າງາມ ແລະ ອ່ອນຊ້ອຍ ທັງເຮັດເປັນຮູບຕົວໜັງສື ເຊິ່ງເປັນສັນຍາລັກຂອງການແຂ່ງຂັນກີລາ ພ້ອມທັງແຝງມາດ້ວຍອະລິຍະທຳຂອງຄົນລາວທີ່ຮັກແລະໄຝ່ຫາສັນຕິພາບຢູ່ຕາມສິນກິນຕາມທຳສຳລັບ “ສິນໄຊແຫ່ງຍຸກສະໄໝ” ເປັນການນຳສະເໜີສິລະປະປ້ອງກັນຕົວມວຍລາຍລາວແລະການຟັນດາບ ເຊິ່ງເປັນວັດທະນະທຳການຕໍ່ສູ້ໜຶ່ງປະຈຳຊາດລາວ ແລະແລ້ວຫຼາຍໆຄົນກໍມີຮອຍຍີ້ມເມື່ອເຍົາວະຊົນຄົນນ້ອຍຂອງລາວອອກມາຕີລັງກາຫຼາຍຮອບຢູ່ກາງສະໜາມ ຕໍ່ດ້ວຍການເຕັ້ນອອກກຳລັງກາຍ ປະກອບສຽງເພງຈັງຫວະມ່ວນຊື່ນ ທັງສະແດງ ເປັນຮູບພາບຕ່າງໆ ກ່ອນຈະສິ້ນສຸດລົງດ້ວຍບົດຟ້ອນ ສຸດທ້າຍ “ໃຈປະສານໃຈ ກ້າວໄປສູ່ອະນາຄົດ” ແລະ ເຕັ້ນບັດສະລົບລາວ ປະສານກັບການຍິງ ບັ້ງໄຟດອກຢ່າງມະໂຫລານຕະການຕາ.

ຂໍຂອບໃຈ: ໜັງສືພິມວຽງຈັນໃໝ່